Дар шаҳри Бӯстон бо мақсади таъмини иҷрои дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон корҳои безараргардонӣ тақвият ёфта истодааст.
Тибқи иттилои масъулин дар ҳудуди шаҳр, кӯчаву хиёбонҳо, ҷойҳои ҷамъиятӣ, бозору марказҳои хизматрасонӣ, коргоҳу муассисаҳо ва манзилҳои аҳолӣ ҳамарӯза корҳои безараргардонӣ ба анҷом расонида шуда, ҳамзамон сокинон метавонанд аз Маркази назорати санитарию эпидемиологии шаҳри Бӯстон маҳлули хлорро дастрас намоянд..
Шуруъ аз охирҳои моҳи апрели соли 2020, яъне аз лаҳзаи дар Тоҷикистон ба қайд гирифтани бемории сироятии коронавирус то ин дам ба зиёда аз 780 нафар сокинони шаҳри Бӯстон ба миқдори зиёда 11 тоннаву 700 литр маҳлули хлор дастрас карда шуд.
Тибқи иттилои директори Маркази назорати санитарию эпидемиологии шаҳри Бӯстон Зайнулло Тешаев дар Марказ захираи кофии маҳлулҳои безарагардонии омодакардашуда мавҷуд буда, сокинон бемамоният имкон доранд тариқи ройгон маҳлулҳоро дастрас намоянд.