Шоми дирӯз дар кӯчаву хиёбон, мавзеъҳои истироҳатӣ, маҳаллаву тангкӯчаҳои шаҳри Хуҷанд маъракаи густурдаи безараргардонӣ бо ҷалби беш аз 20 адад техникаю зиёда аз 70 тонна маводи тамизкорӣ ташкил ва гузаронида шуд. Ин иқдом бо ташаббуси Раёсати ҳифзи муҳити зисти вилояти Суғд дар арафаи иди касбиашон сурат гирифт.
Муовини Раиси вилояти Суғд Рустам Каримзода ва роҳбарияти шаҳри Хуҷанд дар маросими ифтитоҳи чорабинии безараргардонӣ иштирок намуда, ин иқдоми некро амали хайрхоҳона ва қадами устувор барои солимии шаҳрвандон ва пешгирии бемориҳои сироятӣ унвон намуданд.
Зиёда аз 20 адад техникаю таҷҳизот бо фарогирии беш аз 70 тонна маводи тамизкорӣ барои безараргардонии кӯчаву хиёбон, тангкӯчаҳо, мавзеъҳои истироҳатӣ, истгоҳҳо, маҳаллаву микроноҳияҳо сафарбар карда шуданд.
Ин иқдоми мақомоти ҳифзи муҳити зисти вилояти Суғд имкон медиҳад, ки дар шаҳр хуруҷи бемориҳои сироятӣ, бахусус бемориии нави короновирус кам гардад.