Имрўз бо ташаббуси Агентии давлатии ҳифзи иҷтимоии аҳолии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон оид ба ҷорӣ намудани механизми таҷрибавии таъин ва пардохти кумакҳои унвонии иҷтимоӣ ба оилаҳо ва шаҳрвандони камбизоат дар 28 шаҳру ноҳияҳои ҷумҳурӣ ҷаласаи васеи корӣ баргузор гардид.
Дар кори чорабинӣ намояндагони шуъбаҳои ҳифзи иҷтимоии аҳолии шаҳру ноҳияҳо ва сохторҳои марбута иштирок намуданд. Ҷаласаро муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Мирҳаммудин Камолзода бо сухани ифтитоҳӣ ҳусни оѓоз бахшида, қайд намуд, ки бо дастгириву ташаббусҳои хирадмандона ва дастуру ҳидоятҳои бевоситаи Асосгузори сулҳу ваҳдати миллӣ, Пешвои миллат, Президенти кишвар муҳтарам Эмомалӣ Раҳмон соҳаи тандурустӣ ва ҳифзи иҷтимоии аҳолӣ мавриди таваҷҷуҳи махсус қарор гирифта, сол аз сол рушду такомул меёбад. Ҳамзамон, зикр гардид, қабули Қонуни Ҷумҳурии Тоҷикистон «Дар бораи кумакҳои унвонии иҷтимоӣ» ва дигар қонуну санадҳои дахлдор баҳри баланд бардоштани сатҳи зиндагӣ ва некуаҳволии қишри камбизоати ҷомеа мусоидат менамоянд.
Баъдан, сардори Шуъбаи таҳлили сиёсати ҳифзи иҷтимоӣ ва кафолатҳои иҷтимоии давлатии Вазорати тандурустӣ ва ҳифзи иҷтимоии аҳолӣ Муҳабатова Соима баромад намуда, моҳияти Қонуни Ҷумҳурии Тоҷикистон «Дар бораи кумакҳои унвонии иҷтимоӣ»-ро шарҳ дод. Ҳамчунин, сардори Раёсати кафолати кумакҳои иҷтимоии Агентии давлатии ҳифзи иҷтимоии аҳолӣ Ҷўраев Набиҷон ва роҳбари гурўҳи татбиқи лоиҳаи «Таҳкими соҳаи ҳифзи иҷтимоӣ» Каримов Ҷамшед суханронӣ намуда, дар бораи низоми нави таъин ва пардохти кумакҳои унвонии иҷтимоӣ ба оилаҳо ва шаҳрвандони камбизоат дар ҷумҳурӣ ва раванди татбиқи барномаи ин кумакҳо маълумоту машваратҳои муфассал пешниҳод намуданд.
Ҷаласаи корӣ бо ироаи пурсишу посухҳо ва машварату пешниҳодҳои намояндагони шуъбаҳои ҳифзи иҷтимоии аҳолӣ ва сохторҳои дахлдор ба кори худ хотима бахшид.