Мутобиқи Амри Раиси вилоят ва бо мақсади амалӣ намудани чораҳои зиддиэпидемикӣ ҷиҳати пешгирии интиқол ва сирояти бемории коронавирус корҳои тарғиботию ташвиқотӣ дар шаҳру ноҳияҳои вилояти Суғд пурзўр гардида истодааст.
Дар шаҳру ноҳияҳо ситодҳои маҳаллӣ таъсис ёфта, нақшаи чорабиниҳо доир ба ин масъала таҳия ва тасдиқ карда шуданд.
Тавре аз раёсати кор бо занон ва оилаи вилоят хабар доданд, гурўҳҳои корӣ бо усули гардиши “Хона ба хона” дар шаҳру ноҳияҳои Хуҷанд, Бўстон, Панҷакент, Ҷаббор Расулов, Деваштич, Бобоҷон Ғафуров, Исфара, Конибодом, Зафаробод, Шаҳристон бо аҳолӣ мулоқоту вохӯриҳо гузарониданд.
Зимни вохӯриҳо аз сокинон даъват карда шуд, ки аз гаштугузор ва баромадани бидуни зарурат аз худдорӣ намоянд. Ҳар як шахс бояд қоидаҳои гигиенаи шахсию ҷамъиятиро ба таври ҳатмӣ риоя намуда, бе ниқобҳои муҳофизатӣ аз хона набарояд, дар нақлиёт ва дигар ҷойҳои ҷамъиятӣ аз ниқобҳои муҳофизатии тиббӣ истифода намуда, ба таври қатъӣ фосилаи байни ҳамдигарро ба андозаи аз якуним то ду метр нигоҳ дорад.