Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатии худ ба Маҷлиси Олии Ҷумҳурии Тоҷикистон, ки рӯзи 26 декабри соли 2019 баргузор гардид, қайд намуданд, ки «Бо мақсади танзими раванди таъини нафақаи маъюбӣ ва пешгирӣ кардани пардохти нафақаҳои маъюбии беасос ҳоло дар ҳамкорӣ бо шарикони рушд лоиҳаи “Таҳкими низоми ҳифзи иҷтимоӣ” амалӣ шуда истодааст, ки тибқи он махзани ягонаи иттилоотӣ ва тартиби муосири баҳисобгирӣ таҳия гардида, то 6 моҳи минбаъда маълумоти дахлдор ба шабака гузаронида мешавад».
Дар партави Паёми навбатии Пешвои миллат муҳтарам Эмомалӣ Раҳмон бо ташаббуси Агентии давлатии ҳифзи иҷтимоии аҳолии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва мусоидати техникию молиявии Лоиҳаи “Таҳкими низоми ҳифзи иҷтимоӣ” «Маркази воридкунии маълумот ба махзани ягонаи электронии маъюбон» таъсис дода шуд.
Ҷиҳати шиносоӣ бо рафти татбиқи лоиҳаи мазкур дар толори “Кохи Ватан”- и шаҳри Бохтар бо иштироки муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Шодихон Ҷамшед, муовини раиси вилояти Хатлон Фируза Шарифӣ, сардори Хадамоти ташхиси тиббию иҷтимоӣ Шералӣ Амиршозода, сардори Раёсати тандурустии вилояти Хатлон Раҷабзода М.М, сардори Хадамоти ташхиси тиббию иҷтимоии вилояти Хатлон Шарипов И.Ш, роҳбарони муассисаҳои кӯмаки аввалияи тиббию санитарии шаҳру ноҳияҳои вилоят ҷаласаи корӣ баргузор доир гардид.
Дар ҷаласа рафти татбиқи лоиҳаи мазкур дар вилояти Хатлон мавриди баррасӣ қарор дода шуда, инчунин, ҷиҳати бартараф намудани мушкилот ва камбудиҳои мавҷудаи соҳа аз ҷониби муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Шодихон Ҷамшед ба масъулин дастуру супоришҳои мушаххас дода шуд.
![](https://moh.tj/wp-content/uploads/2018/04/8678.jpg")
