Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Мақсад аз баргузории конфронси мазкур шиносоии кишварҳо бо барномаи саломатии хонавода ва ирҷоъи электронӣ (Family Health Program: FHP), табодули таҷрибаи кишварҳо бо якдигар ва баҳрамандӣ аз назарҳои техникӣ ва касбии мутахассисони варзидаи ин соҳа арзёбӣ гардид.

Дар конфронси мазкур панҷ масъала; “Саломати хонавода ва якҷо намудани омӯзиши тиббӣ ва низоми саломат”, “Саломати хонавода ва тақвияти шабакаи беҳдошт ва дармон”, “Саломати хонавода ва мардумисозии низоми саломат”, “Саломати хонавода ва омилҳои иҷтимоии таъсиргузор бар саломат” ва “Саломати хонавода ва саломати электронӣ” мавриди баррасӣ қарор дода шуданд.

Дар доираи иштирок дар ин конфронси сатҳи баланд вазири тандурустӣ ва ҳифзи иҷтимоии аҳолӣ Ҷамолиддин Абдуллозода бо вазири беҳдошт, дармон ва омӯзиши пизишкии Ҷумҳурии Исломии Эрон Баҳром Айнуллоҳӣ вохӯрӣ анҷом дод.

Зимни вохӯрӣ ҷонибҳо доир ба ҳамкориҳои ду кишвари дӯсту бародар дар соҳаи тандурустӣ гуфтугӯи созанда анҷом дода, ҷиҳати густариши ҳамкориҳои дуҷониба дар самтҳои гуногуни соҳа, аз ҷумла табодули таҷрибаи табибони тоҷик дар ин кишвар дар самти ворид намудани усулҳои нави ташхис ва табобат, коркарди гиёҳҳои шифобахши ватанӣ ва дигар самтҳои таваҷҷуҳи тарафайн мубодилаи афкор намуданд.

Бояд гуфт, ки ҳамзамон дар доираи сафари корӣ ба Ҷумҳурии Исломии Эрон вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода аз як қатор муассисаҳои таълимию тиббии ин кишвар дидан ба амал оварда, бо роҳбарияти онҳо ҷиҳати ба роҳ мондани ҳамкориҳо байни муассисаҳои соҳавии ду кишвар сӯҳбат намуд.