Нисфирӯзии санаи 29 анвари соли равон панҷгонике, ки як моҳ қабл дар Муассисаи давлатии “Пажӯҳишгоҳи акушерӣ, гинекологӣ ва перинатологии Тоҷикистон” ба дунё омада буданд, бо сатҳи хуби сиҳатӣ аз таваллудхона рухсат дода шуданд.
Маврид ба ёдоварист, ки истиқоматкунандаи деҳаи Б.Ғафурови ноҳияи Қубодиёни вилояти Хатлон Дилноза Маматова бо омили бисёркӯдаки дар батн аз овони ҳомиладорӣ таҳти назорати қатъии табибон қарор дошт ва ҳанӯз санаи 11 декабри соли 2020 дар Муассисаи давлатии “Пажӯҳишгоҳи акушерӣ, гинекологӣ ва перинатологии Тоҷикистон” бистарӣ гардонида шуда, санаи 30 декабр исми модари панҷгоникро сазовор шуд.
Атфоли панҷгоник 3 духтар ва 2 писар буда, таваллуди панҷгоник дар Ҷумҳурии Тоҷикистон бори аввал аст, ки сурат мегирад.
Дар расми гусели Дилноза Маматова ва фарзандони панҷгоники ӯ муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Зулфия Абдусаматзода, намояндаи Мақомоти иҷроияи ҳокимияти давлатии вилояти Хатлон, роҳбарият ва кормандони Муассисаи давлатии “Пажӯҳишгоҳи акушерӣ, гинекологӣ ва перинатологии Тоҷикистон”, инчунин доираи васеъи намояндагони ВАО иштирок намуданд.
Зимни суханронии хеш Зулфия Абдусаматзода, муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон бори дигар волидон ва наздикону пайвандони панҷгоникро таҳният гуфта, баҳри эшон сиҳатмандии бардавом таманно намуд.
Ҳамзамон зикр гардид, ки вазъи сиҳатии модар ва кӯдакон таҳти таваҷҷуҳи роҳбарияти Вазорати тандурустӣ ва ҳиязи иҷтимоии аҳолии Ҷумҳурии Тоҷикистон қарор хоҳад дошт.
![](https://moh.tj/wp-content/uploads/2018/04/8678.jpg")
