Дар асоси ҳамкориҳои дуҷониба аз тарафи Ҷумҳурии Озарбойҷон ба Ҷумҳурии Тоҷикистон 40 ҳазор вояи ваксинаи “AstraZeneca” ҳамчун кӯмаки башардӯстона дастрас гардид.
Дар маросими таҳвил ва қабули вояҳои ваксинаи мазкур дар фурудгоҳи байналмилалии шаҳри Душанбе мушовири Сафири Ҷумҳурии Озарбойҷон дар Ҷумҳурии Тоҷикистон Вугар Ибрагимов, Консули Ҷумҳурии Озарбойҷон дар Ҷумҳурии Тоҷикистон Элмаддин Рзаев, сардори Раёсати санитарию эпидемиологии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Навруз Ҷафаров, директори генералии Маркази ҷумҳуриявии иммунопрофилактикаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Файзалӣ Саидзода иштирок намуданд.
Қайд гардид, ки тақдими вояҳои ваксинаи мазкур аз ҷониби кишвари Озарбойҷон ба Ҷумҳурии Тоҷикистон идомаи ҳамкориҳои мутақобилан судманди ду кишвар ба шумор рафта, ин ташаббус аз равобити неки ду кишвари дӯсту бародар гувоҳӣ медиҳад.
Бояд гуфт, ки вояҳои ваксинаи мазкур дар анбори махсуси Вазорати тандурустӣ ва ҳифзи иҷтимоии аҳолии Ҷумҳурии Тоҷикистон нигаҳдорӣ шуда, дар асоси нақша ба аҳолии мамлакат гузаронида мешаванд.
![](https://moh.tj/wp-content/uploads/2018/04/8678.jpg")
