Дар доираи ҳамкориҳои дуҷониба байни Ҳукумати Тоҷикистон ва Федератсияи Россия субҳи имрӯз, 13 августи соли равон ба Тоҷикистон 50 ҳазор маҷмӯъ барои 50 ҳазор нафар ваксинаи “Спутник V”-и Россия ворид гардид.
Дар расми қабули ваксинаҳо дар фурудгоҳи байналмилалии шаҳри Душанбе муовинони вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода, Абдухолиқ Амирзода, намояндаи ваколатдори Сафорати Федератсияи Россия дар Тоҷикистон ва дигар шахсони расмӣ иштирок намуданд.
Бояд гуфт, ки ваксинаҳои мазкур дар анборҳои махсуси вазорат нигаҳдорӣ шуда, дар асоси рӯйхати тартибдодашуда ба шаҳрвандон гузаронида мешаванд.
Қобили зикр аст, ки ҷиҳати иҷрои қарори Ситоди ҷумҳуриявӣ оид ба пурзӯр намудани чораҳои зиддиэпидемиявӣ ва пешгирӣ аз интиқолу паҳншавии бемории сироятии COVID-19 дар Ҷумҳурии Тоҷикистон дар самти ба ваксинатсия зидди бемории COVID-19 фаро гирифтани шаҳрвандони мамлакат ва дар асоси нақшаи пешбинишуда имрӯзҳо дар тамоми манотиқи кишвар маъракаи иммунизатсия бар зидди бемории мазкур бомаром идома дорад.
Тавре аз мушоҳидаҳо бармеояд, имрӯзҳо сокинони мамлакат бо як масъулияти баланд баҳри ҳифзи саломатии худ ва наздиконашон ба муассисаҳои тандурустии маҳалли зисти хеш муроҷиат намуда, ваксинаи зидди ин беморӣ гирифта истодаанд.
Маъракаи иммунизатсия бар зидди бемории каронавируси COVID-19 тамоми ҷумҳурӣ дар сатҳи баланд ҷараён дошта, сокинон аз ғамхориҳои пайвастаи ҳукумати кишвар хоссатан дар самти саривақт дастрас намудани ваксинаи зидии бемории каронавирус сипосгузории хешро иброз медоранд.
![](https://moh.tj/wp-content/uploads/2018/04/8678.jpg")
