Бо иштироки раиси вилояти Хатлон Қурбон Ҳакимзода дар деҳаи Зарнисори ҷамоати деҳоти 50-солагии Тоҷикистони ноҳияи Абдураҳмони Ҷомӣ як бунгоҳи тиббии замонавӣ мавриди баҳрабардорӣ қарор дода шуд.
Тавре аз ҳукумати вилояти мазкур ба moh.tj иттилоъ доданд, бунгоҳи тиббии мазкур бо дастгирии ташкилоти байналмилалии “Шориқа”-и Аморати муттаҳидаи Араб сохта шуда, он бо таҷҳизоти замонавӣ муҷаҳҳаз гардонида шудааст. Бунгоҳи тиббӣ аз се утоқи корӣ иборат буда, дар он чор нафар духтурон ва кормандони техникӣ фаъолият менамоянд.
Раиси вилояти Хатлон Қурбон Ҳакимзода зимни боздид аз бунгоҳи тиббии мазкур диққати духтурон ва роҳбарони муассисаҳои тандурустиро пеш аз ҳама ба солимии аҳли ҷомеа, пешгирии касалиҳои сирояткунанда ҷалб намуда, барои бартараф намудани камбудиҳои мавҷуда ба масъулин супоришҳои мушаххас дод.