Директори Маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Бибихонум Дарвешзода бо “Сипоснома”-и Кумитаи кор бо ҷавонон ва варзиши назди Ҳукумати Ҷумҳурии Тоҷикистон қадрдонӣ карда шуд.
“Сипоснома”-и мазкур, ки аз ҷониби раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода тақдим гардидааст, дар матни он аз ҷумла омадааст: “барои дар сатҳи баланди ташкилӣ баргузор намудани силсилаи чорабиниҳои тарғиботиву ташфиқотӣ, фарҳангию маърифатӣ, оммавию варзишӣ ва солимгардонӣ дар ноҳияи Тоҷикобод бахшида ба солҳои 2019-2021 “Солҳои рушди деҳот, сайёҳӣ ва ҳунарҳои мардумӣ сарфароз гардонида шуд”.
Бибихонум Дарвешзода аз моҳи октябри соли 2018 дар вазифаи Директори Маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон то кунун фаъолият дорад.
Маврид ба ёдоварист, ки ӯ чанде қабл бахшида ба Рӯзи байналмилалии матбуоти озод, ки 3 май дар сар то сари олам таҷлил карда мешавад, сазовори Ҷоизаи “Ҳамраъйии касбӣ”-и Шӯрои ВАО-и Тоҷикистон гардида буд.
Бибихонум Дарвешзода қаблан дар расонаҳои гуногуни давлатӣ, аз ҷумла ба ҳайси хабарнигор, котиби масъул ва ҷонишини сармуҳаррири ҳафтаномаи Ҳизби халқии демократии Тоҷикистон-“Минбари халқ” фаъолият намуда, собиқаи 21 солаи корӣ дар соҳаи журналистикаро дорад.
![](https://moh.tj/wp-content/uploads/2018/04/8678.jpg")
