Бахшида ба 28-умин солгарди Истиқлолияти давлатии Ҷумҳурии Тоҷикистон бо ташаббуси Сарраёсати Хадамоти давлатии фаъолияти фарматсевтии вилояти Суғд як зумра собиқадорони соҳаи дорусозӣ ва тибби хусусӣ қадршиносӣ шуданд.
Ба ин муносибат дар маҷлисгоҳи Сарраёсати Хадамоти давлатии фаъолияти фарматсевтии вилояти Суғд ҷамъомади тантанавӣ баргузор гардид.
Сардори сарраёсати мазкур Илҳом Ҷабборов зимни баромади идона аз ҷумла иброз дошт, ки «Истиқлолият шиносномаи ҳастии давлати тоҷикон дар ҷомеаи ҷаҳонист, ки низоми давлатдорӣ, сиёсати дохилию хориҷӣ, сиёсати иҷтимоӣ, иқтисодӣ ва фарҳангии хешро мустақилона пеш мебарад».
Пасон ӯ дар бораи саҳми собиқадорони бахши дорусозӣ ва тибби хусусӣ дар пешрафти соҳа ибрози андеша намуда, аз ҷумла қайд намуд, ки фаъолияти меҳнативу зиндагии онҳо барои мутахассисони ҷавони соҳа намунаи ибрат буда, ғамхорӣ дар ҳаққашон аз вазифаҳои муқаддаси роҳбарияти ин соҳаи муҳими тандурустии кишвар маҳсуб мешавад.
Дар идомаи чорабинии идона дар вазъияти тантанавӣ ба 56 нафар собиқадорону кормандони соҳаи дорусозӣ ва тибби хусусӣ Ифтихорномаву Сипоснома ва тӯҳфаҳои хотиравӣ тақдим карда шуд.
Аз номи собиқадорони меҳнат Аълочии тандурустии СССР, собиқ сардори Идораи дорухонаҳои вилояти Суғд Исохоҷа Каримхоҷаев ва мудири Озмоишгоҳи Хадамоти назорати давлатии санитарию эпидемиологии вилоят Мӯъминҷон Қурбонов баромад карда, ба роҳбарияти Сарраёсати Хадамоти давлатии фаъолияти фармасевтии вилояти Суғд барои қадршиносии меҳнати хоксоронаашон арзи сипосу миннатдорӣ карданд.