Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

3 феврали соли равон дар Беморхонаи клиникӣ ба номи Б. Воҳидови шаҳри Бохтар ҷаласаи кории Раёсати тандурустии вилояти Хатлон оид ба андешидани тадбирҳои мушаххас ҷиҳати пешгирии  сироти коронавирус баргузор гардид, ки дар он роҳбарияти раёсат, роҳбарон ва кормандони марказҳои тандурустии вилоят ва дигар кормандони соҳа иштирок намуданд.

Сардори Раёсати тандурустии мақомоти иҷроияи ҳокимияти давлатии  вилояти Хатлон Раҷабзода. М. М. зимни сухани ифтитоҳии ҷаласа иброз намуд, ки масъалаи андешидани тадбирҳои иловагӣ бар зидди сирояти коронавирус, ки дар Ҷумҳурии Мардумии Чин ба қайд гирифта шудааст, айни замон зери назорати махсуси Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Вазорати тандурустӣ ва ҳифзи иҷтимоии аҳолии Ҷумҳурии Тоҷикистон қарор дорад.

Дар идомаи суханронии хеш номбурда ҳамзамон таъкид намуд, ки барои пешгирӣ ва табобати сирояти мазкур бояд муассисаҳои тандурустии вилояти Хатлон  ҳамаҷониба омода бошанд.

Дар идомаи ҷаласа директори Маркази назорати давлатии санитарию эпидимиологии вилояти Хатлон Абдураҳимзода К.К. оид ба тадбирҳои андешидашуда ҷиҳати пешгирии сирояти коронавирус дар вилояти Хатлон баромад намуда, иброз дошт ки то имрӯз аз ҷониби Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо мақсади пешгирии интиқоли сирояти коронавирус ва Раёсати тандурустии мақомоти иҷроияи ҳокимияти давлатии  вилояти Хатлон  ситоди доимоамалкунанда таъсис дода шуда, назорат дар гузаргоҳҳои сарҳади Панҷ, ҶСК фурудгоҳҳои байналмиллалии шаҳрҳои Бохтар ва Кӯлоб, Намояндагии КВД “Роҳи оҳани Тоҷикистон” дар шаҳрҳои Левакант ва Кӯлоб аз ҷониби нуқтаҳои назорати санитарию карантинӣ назорати эпидемиологӣ пурзӯр карда шудааст.

Тавре дар ҷаласаи мазкур сардухтури Беморхонаи клиникӣ ба номи Б.Воҳидови шаҳри Бохтар  Нурализода А.Ҷ. гуфт: “то имрӯз дар вилояти Хатлон ягон ҳодисаи гумонбар ба сирояти коронавирус мушоҳида нагардидааст. Аммо, новобаста ба ин,  бо мақсади пешгирии интиқоли он ҷиҳати дар ҳолати омодабош қарор доранд, ба муассисаҳои табобатию профилактикӣ, аз ҷумла омӯзиш ва мушоҳидаи ҳаррӯзаи вазъи эпидемиологӣ ва паҳншавии БШРН дар шаҳру ноҳияҳои вилоят, гузаронидани омӯзишҳо оид ба пешгирӣ ва муолиҷаи сирояти коронавирус барои мутахассисони муассисаҳои табобатию профилактикӣ, гузаронидани омӯзиш ва  ташкил намудани гаштҳои хонагӣ ва дарёфту муоина намудани беморони шадиди роҳи нафас ва  омода намудани ҳуҷраҳои алоҳидаи ҷудогардонӣ (изолятсия) барои бистарӣ ва муоина намудани гумонбарон ба сирояти короновирус, омода намудани ҳуҷраҳои алоҳида дар шӯъбаи бемориҳои сироятӣ дорои 60 кат дар Беморхонаи клиникӣ вилояти ба номи Б.Воҳидови шаҳри Бохтар ташкил карда шудааст. Вазъият зери назорати қатъии Раёсати тандурустии вилоят ва сохторҳои он қарор дошта, ҳамзамон, дар шаҳру ноҳияҳои вилоят ситоди доимоамалкунанда фаъолият дорад”.