Вазорати тандурустӣ ва ҳифзи иҷтимоии аҳолии Ҷумҳурии Тоҷикистон иттилоъ медиҳад, ки то 6 майи соли ҷорӣ дар муассисаҳои табобатии кишвар 3596 нафар зери назорати табибон қарор дошта, дар як шабонарӯзи охир 246 нафар пас аз гузаронидани ташхису муоина дар ҳолати қаноатбахш аз муассисаҳои табобатӣ ба хонаҳояшон ҷавоб дода шудаанд.
Ҳамзамон, вазорат иттилоъ медиҳад, ки то соати 17:30 дақиқаи 6 майи соли равон дар мамлакат 379 ҳодисаи сирояти коронавируси нави COVID-19 ба қайд гирифта шуда, 8 нафар бар асари ин вирус фавтидаанд.
Аз тамоми сокинони кишвар даъват ба амал меорем, ки ҷиҳати пешгирии сирояти коронавируси нави COVID-19 қоидаҳои беҳдошти шахсиро қатъиян риоя ва ҳамзамон дар ҳолати пайдо гардидани нишонаҳои ин беморӣ фавран ба табиби оилавии минтақаи хеш муроҷиат намоянд.
Зикр намудан ба маврид аст, ки Ҳукумати Ҷумҳурии Тоҷикистон ва Вазорати тандурустӣ ва ҳифзи иҷтимоии аҳолӣ айни замон ҷиҳати пешгирӣ ва табобати коронавируси нави CОVID-19 тамоми тадбир ва чораҳои заруриро амалӣ намуда истодаанд.