Аз ҷониби кормандони Муассисаи давлатии “Маркази ҷумҳуриявии ташаккули тарзи ҳаёти солим” ва филиалҳои он дар шаҳру ноҳияҳои кишвар бо мақсади пешгирии бемории COVID-19 ва дар ин замина пурзӯр намудани корҳои фаҳмондадиҳӣ дар байни аҳолӣ, аз ҷумла ҷиҳати пӯшидани ниқоби тиббӣ, риояи фосилаи иҷтимоӣ чорабиниҳои иттилоотӣ-тарғиботӣ пурзӯр карда мешаванд.
Аз ҷумла, имрӯз, 7 июли соли равон аз ҷониби кормандони Маркази ҷумҳуриявии ташаккули тарзи ҳаёти солим дар шаҳри Ҳисор дар кӯчаву хиёбонҳои шаҳри мазкур корҳои оммафаҳмонӣ гузаронида шуд.
Зимни вохурӣ ба шахсоне, ки қоидаҳои гигиенаи шахсӣ ва ҷамъиятӣ, пӯшидани ниқобҳои тиббӣ ва фосилаи иҷтимоиро риоя намекунанд, нисбат ба хатарҳои бемории COVID-19 иттилоъ дода шуда, ҳамзамон, аз онҳо даъват ба амал оварда шуд, ки ҳангоми гаштугузор дар кӯчаву хиёбонҳо тозагӣ, пӯшидани ниқоб ва фосилаи иҷтимоиро қатъиян риоя намоянд.
Дар ин росто, зикр намудан ба маврид аст, ки аз ҷониби кормандони Муассисаи давлатии “Маркази ҷумҳуриявии ташаккули тарзи ҳаёти солим” дар шаҳру ноҳияҳои кишвар низ дар байни аҳолӣ ҷиҳати пешгирии бемории COVID-19, аз ҷумла пӯшидани ниқоби тиббӣ, риояи фосилаи иҷтимоӣ пайваста корҳои оммафаҳмонӣ гузаронида мешаванд.