Давоми нимсолаи якуми соли 2020 бо мақсади рушди тибби оилавӣ дар заминаи Муассисаи давлатии “Маркази ҷумҳуриявии таълимию клиникии тибби оилавӣ”, марказҳои вилоятӣ ва шӯъбаҳои байниноҳиявӣ 395 нафар кормандони тиб (41 нафар табиб ва 354 нафар корманди миёнаи тиб) давраи бозомӯзиро аз рӯи ихтисоси тибби оилавӣ хатм намуданд. Инчунин, давраҳои такмили ихтисосро аз рӯи барномаҳои “Масъалаҳои муҳими кори ҳамширагӣ дар тибби оилавӣ”, “Масъалаҳои муҳими тибби оилавӣ”, “Масъалаҳои муҳими бемориҳои кӯдакона”, “Назорат ва нигоҳубини кӯдакон ва наврасон” ва “Нигоҳубин ва назорати ҳомиладории физиологӣ”-ро 387 нафар мутахассисони тибби оилавӣ, аз он ҷумла 134 нафар табибон ва 253 нафар кормандони миёнаи тиб карданд.
Бояд гуфт, ки дар маҷмӯъ то имрӯз шумораи табибони оилавии омӯзонидашуда дар ҷумҳурӣ 4 283 нафар ва ҳамшираҳои тибби оилавӣ 7704 нафарро ташкил медиҳанд.
Бо мақсади баланд бардоштани сатҳ ва сифати маҷмӯи хизматрасониҳои тиббию санитарӣ ба аҳолӣ дар сатҳи шабакаи муассисаҳои КАТС бо иштироки сармутахассисони соҳавии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва коршиносони байналмилалӣ 110 адад протоколҳои клиникӣ таҳия гардида, бо фармоиши Вазорати тандурустӣ ва ҳифзи иҷтимоии аҳолии Ҷумҳурии Тоҷикистон аз 19 июни соли 2020, №456 тасдиқ карда шуданд.
Ҷиҳати баланд бардоштани сатҳ ва сифати таълим дар заминаи Шуъбаи таълимию клиникии тибби оилавии ноҳияи Рашт “Маркази худомӯзии мутахассисони тибби оилавӣ” таъсис дода шуд, ки бо таҷҳизотҳои муосири телекоммуникатсионӣ, компютерӣ, чопӣ, маҷмуаҳои таълимӣ ва адабиётҳои тахассусӣ ҷиҳозонида шуда, аз ҷониби омӯзгорон даврҳои омӯзишии фосилавӣ бо мутахассисони шабакаҳои муассисаҳои КАТС-и минтақаи Рашт гузаронида мешаванд.