Нимаи дуюми рӯзи 28 август таҳти раёсати Раиси вилояти Суғд, Раиси Ситоди вилоятӣ оид ба пурзӯр намудани тадбирҳои зиддиэпидемиявӣ ва пешгирӣ аз паҳншавии бемории сироятии коронавируси COVID-19 Раҷаббой Аҳмадзода ҷаласаи навбатии ситоди вилоятӣ доир шуд.
Дар ҷаласа нахуст гузориши муовини Раиси вилоят ва ҳамзамон муовини раиси ситоди вилоятӣ Зайнура Азимӣ шунида шуд. Таъкид гардид, ки тибқи дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар вилоят барои пешгирии интиқолу сирояти беморӣ аз тамоми имкониятҳо истифода гардида истодааст.
Бо назардошти вазъи мавҷуда зикр карда шуд, ки бояд дар ҷойҳои ҷамъиятӣ, аз ҷумла нақлиёти умумб корҳои безараргардонӣ мунтазам гузаронида шавад.
Ҳамзамон корҳои фаҳмондадиҳӣ миёни сокинон тақвият бахшида шавад ва шаҳрвандон ҷиҳати риояи гигенаи шахсӣ, қоидаҳои санитарӣ, масофаи муқарраршуда, истифодаи ниқобҳои муҳофизатӣ ва маводи антисептикӣ масъулияти бештар эҳсос намоянд.
Риояи дастуру талаботи Ситоди ҷумҳуриявӣ оид ба пурзӯр намудани тадбирҳои зиддиэпидемиявӣ ва пешгирӣ аз паҳншавии бемории сироятии коронавируси COVID-19 ҳангоми гузаронидани тӯй ва дигар маросимҳо низ бояд назорат карда шавад.