Дар доираи сафари кории хеш ба вилояти Суғд муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Самариддин Ализода ва Намояндаи Ташкилоти умумиҷаҳонии тандурустӣ дар Тоҷикистон Бахтигул Карриева бо Раиси вилояти мазкур Раҷаббой Аҳмадзода вохурӣ намуданд.
Раиси вилояти Суғд Раҷаббой Аҳмадзода зимни вохурӣ аз дастгириҳои пайвастаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба соҳаи тандурустӣ ёдовар шуда, иброз намуд, ки маҳз дар партави таваҷҷуҳи хосаи Роҳбари давлат ба соҳа давоми солҳои охир дар вилояти Суғд садҳо муассисаҳои хуштарҳу замонавӣ ва муҷаҳҳаз бо таҷҳизоти ҳозиразамон сохта ба истифода дода шуданд.
Номбурда иброз намуд, ки ҷиҳати татбиқи сиёсати давлат ва Ҳукумати кишвар дар самти таъмини солимии аҳолӣ аз ҷониби мақомоти иҷроияи ҳокимияти давлатии вилояти Суғд низ тадбирҳои муҳим амалӣ карда шудаанд ва корҳо дар ин самт минбаъд низ идома хоҳанд ёфт.
Дар идомаи вохурӣ ҷонибҳо доир ба вазъи санитарию эпидемиологӣ дар вилояти Суғд ва тақвият бахшидани корҳо дар самти пешгирӣ ва табобати бемории COVID-19 табодули афкор намуданд.
Зикр гардид, ки роҳбарияти мақомоти иҷроияи ҳокимияти давлатии вилояти Суғд ҷиҳати пешгирӣ ва табобати бемории COVID-19 дар вилоят тамоми тадбирҳои заруриро андешида истодааст.
![](https://moh.tj/wp-content/uploads/2018/04/8678.jpg")
