7 декабри соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вобаста ба пешгирӣ ва табобати бемории COVID-19 семинар-машварати онлайнӣ доир гардид, ки дар он директори Институти саломатии ИМА доктор Ораш Алоӣ, муовинони вазири тандурустӣ ва ҳифзи иҷтимоии аҳолии Ҷумҳурии Тоҷикистон, роҳбарони муассисаҳои тандурустӣ ва табибоне, ки бевосита гирифторони коронавируси нави COVID-19-ро табобат мекунанд, иштирок намуданд.
Директори Институти саломатии ИМА доктор Ораш Алоӣ зимни семинар-машварати мазкур доир ба усулҳои нави ташхис ва табобати бемории COVID-19 ба иштирокчиён маълумот пешниҳод намуд.
Зикр гардид, ки яке аз роҳҳои пешгирии ин беморӣ дар нақлиёти ҷамъиятӣ ва хона пайваста тирезаҳоро боз намудан мебошад. Гуфта шуд, ки ин омил метавонад ҷиҳати сироят нашудани шаҳрвандон ба бемории мазкур мусоидат намояд.
Дар ин росто, қайд гардид, ки риояи ҳатмии реҷаи ниқоб низ дар самти пешгирии бемории коронавируси нави COVID-19 хеле манфиатбахш мебошад. Бинобар ин, таъкид гардид, ки бояд масъалаи мазкур ҳарчи бештар ба мардум фаҳмонида шавад.
Инчунин, директори Институти саломатии ИМА доктор Ораш Алоӣ як сабаби кам гирифтор шудан ва фавт аз онро дар кишвар бар асари бемории COVID-19 ба он рабт намуд, ки Тоҷикистон кишвари кӯҳсор аст ва ҷойҳои издиҳом дар он кам вуҷуд доранд. Гуфта шуд, ки чун аксар мардуми Тоҷикистон дар кӯҳистон зиндагӣ мекунанд, дар он ҷойҳо метавон фосилаи иҷтимоиро ба хубӣ риоя кард
Дар охир миёни иштирокчиёни семинар-машварати мазкур дар самти роҳҳои табобати бемории коронавируси нави COVID-19 бахши саволу ҷавоб доир гардид.