Дар Муассисаи давлатии “Пажӯҳишгоҳи акушерӣ, гинекологӣ ва перинатологии Тоҷикистон” истиқоматкунандаи деҳаи Б.Ғафуров, ноҳияи Қубодиёни вилояти Хатлон Дилноза Маматова панҷгоник таваллуд намуд. Панҷгоникҳо 3 духтар ва ду писар мебошанд.
Гуфта шуд, ки зан аз 11 декабри соли равон дар муассисаи мазкур зери назорати табибон қарор дошт ва 30 декабр таваллуд намуд.
Ҷиҳати шиносоӣ бо вазъи саломатии Дилноза Маматова ва тифлҳои он имрӯз, 31 декабри соли равон муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Зулфия Абдусаматзода ба муассисаи мазкур ташриф овард.
Аснои боздид номбурда бо вазъи саломатии панҷгоникҳо ва модари онҳо Дилноза Маматова шинос шуда, ҷиҳати беҳтар расонидани хизматрасонии тиббӣ ба масъулин дастуру супоришҳои мушаххас дод.
Ҳамзамон, ба муносибати Соли нави мелодӣ аз ҷониби Зулфия Абдусаматзода ба модари панҷгоникҳо туҳфаи хотирмон тақдим карда шуд.
Бояд гуфт, ки айни замон вазъи саломатии Дилноза Маматова ва панҷгоникҳо муътадил мебошад.
![](https://moh.tj/wp-content/uploads/2018/04/8678.jpg")
