Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

22 апрели соли равон дар шаҳри Бохтари вилояти Хатлон ҷиҳати амалишавии “Нақшаи миллии амалҳо оид ба омодагии Ҷумҳурии Тоҷикистон барои тасдиқ ва амалинамоии Конвенсия дар бораи ҳуқуқҳои маъюбон” семинари омӯзишӣ  баргузор гардид, ки дар он муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Шодихон Ҷамшед, сардори Раёсати ҳифзи иҷтимоии вазорат Қудратулло Қурбонов, роҳбарони як қатор ташкилотҳои маъюбон иштирок намуданд.

Шодихон Ҷамшед, муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон зимни ифтитоҳи  семинари мазкур доир ба дастгирии табақаҳои осебпазири аҳолӣ, махсусан маъюбон аз ҷониби давлат ва Ҳукумати Тоҷикистон ёдовар шуда, иброз дошт, ки имрӯз ин табақаи ҷомеа зери таваҷҷуҳи махсуси Пешвои муаззами миллат муҳтарам Эмомалӣ Раҳмон қарор доранд.

Дар идомаи  семинари омӯзишӣ як қатор иштирокчиён доир ба масъалаҳои гуногун, аз ҷумла мушкилот ва дурнамои соҳа баромад намуданд.

Қобили зикр аст, ки соли 2018 аз ҷониби Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Конвенсияи Созмони Милали Муттаҳид оид ба ҳуқуқҳои маъюбон ба тасвиб расонида шуд. Айни замон ҷиҳати иҷрои “Нақшаи миллии амалҳо оид ба омодагии Ҷумҳурии Тоҷикистон барои тасдиқ ва амалнамоии Комиссия дар бораи ҳуқуқҳои маъюбон», ки ба Қарори Ҳукумати Ҷумҳурии Тоҷикистон аз 27 феврали соли 2020, №116 тасдиқ  гардидааст, аз ҷониби Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва сохторҳои марбутаи системаи он тадбирҳои зарурӣ андешида шуда истодаанд.