Дар доираи нақшаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва Ташкилоти “Иттиҳоди табибони ҷавон”-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон 25 майи соли равон роҳбарияти Иттиҳоди табибони ҷавон ба Донишгоҳи миллии Тоҷикистон ташриф оварда, бо роҳбарият, донишҷӯён ва хатмкунандагони факултетҳои тиббӣ ва фарматсевтӣ мулоқот намуд.
Бобоҷон Сафаралиев, роҳбари “Иттиҳоди табибони ҷавон” зимни вохурӣ аз имкониятҳо ва дастгириҳои роҳбарияти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон нисбат ба мутахассисони ҷавон ва донишҷӯёни риштаи тибби кишвар ёдовар шуда, аз ҷумла иброз дошт, ки иттиҳоди мазкур метавонад дар ташаккули касбии кормандони ҷавони соҳаи тандурустӣ нақши созгори хешро гузорад.
Зикр гардид, ки ҳадаф аз таъсиси чунин иттиҳод дар назди Вазорати тандурустӣ ва ҳифзи иҷтимоии аҳолии Ҷумҳурии Тоҷикистон-ин пеш аз ҳама пайдо намудани истеъдодҳо дар миёни табибони ҷавон, дастгирӣ ва ҳавасмандгардонии онҳо дар самти фаъолият ва идомаи таҳсили баъдидипломии донишандузони ҷавони соҳа мебошад.
Ҳамзамон, дар мулоқот масъалаҳои густариши ҳамкориҳои доимии донишҷӯёни факултетҳои мазкур бо “Иттиҳоди табибони ҷавон” ва иштироки онҳо дар чорабиниҳои гуногуни ҷамъиятии соҳавӣ мавриди баррасӣ қарор дода шуданд.
![](https://moh.tj/wp-content/uploads/2018/04/8678.jpg")
