Бо мақсади табодули таҷриба дар самти пешгирӣ, ташхис ва табобати гирифторони бемории COVID-19 имрӯз, 15 июл бо иштироки вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода, муовини якуми вазир Ғафур Муҳсинзода, сармутахассисони соҳавии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва мутахассисони Ҷумҳурии Халқии Хитой видеоконфронс доир гардид.
Ҷамолиддин Абдуллозода, вазири тандурустӣ ва ҳифзи иҷтимоии аҳолии Ҷумҳурии Тоҷикистон зимни ифтитоҳи видеоконфронс иброз намуд, ки ҳадаф ва мақсад аз баргузории чорабинии имрӯза-ин пеш аз ҳама табодули таҷрибаи табибони ду кишвар дар самти пешгирӣ ва ташхису табобати бемории коронавирус мебошад.
Тавре зикр гардид, таҷрибаи табибони Ҷумҳурии Халқии Хитой воқеан ҳам дар самти ташхис ва табобати ин беморӣ намунаи ибрат ва қобили омӯзиш мебошад.
Дар идомаи видеоконфронс мутахассисони ду кишвар вобаста ба усулҳои нави ташхис ва табобати бемории мазкур мубодилаи афкор намуданд.
![](https://moh.tj/wp-content/uploads/2018/04/8678.jpg")
