Имрӯз, 9 октябри соли равон дар Муассисаи давлатии “Маҷмааи тандурустии “Истиқлол” ҷиҳати ба роҳ мондани тарзи табобати ҷарроҳии рентгенэндоваскулярӣ ба беморони гирифтори бемориҳои рагҳои хунгарди мағзи сар (анвермиза, малформатсия, сактаи мағзи сар ва ғайраҳо) дар кишвар мизи мудаввар баргузор гардид, ки дар он муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода, роҳбари Беморхонаи марказии клиникии шаҳри Алма-атои Ҷумҳурии Қазоқистон Бердихоҷаев Мынжылкы Сайлауович ва мудири шӯъбаи ҷарроҳии асаби ин муассиса Марат Саршаев, Сармутахассиси соҳавии Вазорати тандурустӣ ва ҳифзи иҷтимоии аҳолии ҶТ оид ба ҷарроҳии рагҳои хунгард, Аъзои вобастаи АМИТ, д.и.т., профессор Алиҷон Ғоибзода, роҳбарият ва доираи васеи кормандони муассисаи мазкур иштирок намуданд.
Муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода нахуст меҳмононро ба Тоҷикистон хайрамақдам намуда, ташрифи онҳоро барои табодули таҷриба бо табибони тоҷик дар самти ҷорӣ намудани усулҳои нави ҷарроҳӣ муҳим ва саривақтӣ арзёбӣ намуд.
Қайд гардид, ки ҳамкориҳои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо Вазорати тандурустии Ҷумҳурии Қазоқистон имрӯз дар сатҳи хуб ба роҳ монда шуда, самараи нек дода истодаанд, ки ташрифи табибони ин кишвар ба Тоҷикистон идомаи ҳамкориҳои дуҷонибаи вазоратҳои тандурустии мамлакатҳои мазкур ба шумор меравад.
Дар идомаи мизи мудаввар мутахассисони ду кишвар ҷиҳати ба роҳ мондани тарзи табобати ҷарроҳии рентгенэндоваскулярӣ ба беморони гирифтори бемориҳои рагҳои хунгарди мағзи сар (анвермиза, малформатсия, сактаи мағзи сар ва ғайраҳо) дар Тоҷикистон табодули афкор намуданд.
![](https://moh.tj/wp-content/uploads/2018/04/8678.jpg")
