Бахшида ба Соли нави мелодии 2022 имрӯз, 30 декабри соли равон вазири тандурустӣ ва ҳифзи иҷимоии аҳолии Ҷумҳурии Тоҷикистон Ҷамолиддин Абдуллозода ба Муассисаи давлатии “Маркази ҷумҳуриявии саломатии равонии кӯдакон ва наврасон” ташриф оварда, ба бошандагони муассисаи мазкур туҳфаҳои солинавӣ тақдим намуд.
Нахуст вазири тандурустӣ ва ҳифзи иҷтимоии аҳолии Ҷумҳурии Тоҷикистон бошандагони маркази мазкурро аз номи роҳбарияти вазорат ба Соли нави мелодии 2022 табрику шодбош намуда, иброз дошт, ки Ҳукумати Тоҷикистон, хосатан Пешвои муаззами миллат муҳтарам Эмомалӣ Раҳмон ба ин қишри ҷомеа пайваста ғамхорӣ зоҳир менамоянд ва ҳеҷ гоҳ намегузоранд, ки ин табақа худро танҳо эҳсос намоянд.
Дар идома Ҷамолиддин Абдуллозода ба бошандагони марказ туҳфаҳои солинавӣ тақдим намуда, инчунин бо фаъолияти марказ ва сатҳи хизматрасонии он шинос шуд.
Ҳамзамон, имрӯз муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Шодихон Ҷамшед ба Муассисаи давлатии “Маркази миллии тавонбахшии кўдакони маъюб “Чорбоғ” дар ноҳияи Варзоб ташриф оварда, аз номи вазорат ба бошандагони муассиса 10 аробачаи маъюбӣ, сару либос ва туҳфаҳои солинавӣ тақдим намуд.
Аснои суханронӣ номбурда бошандагон ва кормандони муассисаи мазкурро ба Соли нави мелодии 2022 муборакбод намуда, аз дастгирӣ ва таваҷҷуҳи хосаи Пешвои муаззами миллат муҳтарам Эмомалӣ Раҳмон ба табақаҳои ниёзманди аҳолӣ, аз ҷумла ба ятимону маъюбон ёдовар шуда, иброз дошт, ки ин табақаи қишри ҷомеа ҳамеша дар маркази таваҷҷуҳи давлат ва Ҳукумати Тоҷикистон қарор доранд.
![](https://moh.tj/wp-content/uploads/2018/04/8678.jpg")
