Бо мақсади баланд бардоштани савияи дониш ва таҷрибаи кормандони бахши ҳифзи иҷтимоӣ аз 16 феврал то 16 марти соли равон як қатор кормандони шӯъбаҳои хизматрасонии иҷтимоӣ дар хонаи ноҳияҳои шаҳри Душанбе, ноҳияҳои тобеи ҷумҳурӣ ва шаҳру навоҳии вилояти Хатлон аз курси такмили ихтисос гузаштанд.
Маросими ҷамъбастии курси якуми такмили ихтисоси Муассисаи давлатии “Маҷмааи таълимию таҷрибавии кори иҷтимоӣ ва инноватсияҳо” дар соли 2022 имрӯз дар муассисаи макзур баргузор гардид, ки дар ҷараёни он муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Шодихон Ҷамшед, роҳбарияти марказ ва шунавандагони курси мазкур иштирок намуданд.
Муовини вазири тандурустӣ ва ҳифзи иҷтимоии аҳолии мамлакат зимни суханронии хеш доир ба зарурати баргузории курсҳои такмили ихтисос ба кормандони бахшҳои ҳифзи иҷтимоии шаҳру навоҳии мамлакат ибрози андеша намуда, иброз дошт, ки ин иқдом имкон медиҳад, ки дониш ва таҷрибаи кормандони соҳа баланд бардошта шуда, хизматрасонии бахши ҳифзи иҷтимоӣ низ дар кишвар ҳарчӣ беҳтар гардад.
Қайд гардид, ки бо мақсади санҷиши сатҳи донишҳои кормандони ба курси такмили ихтисос даъватшуда пеш аз оғози курс аз онҳо тести пешазомӯзӣ гирифта шуд.
Дар охир барои бо муваффақият ба анҷом расонидани курси такмили ихтисос ба шунавандагон Шаҳодатнома тақдим карда шуд.
![](https://moh.tj/wp-content/uploads/2018/04/8678.jpg")
