Тавре қаблан иттилоъ дода будем, миссияи Бонки ҷаҳонӣ таҳти роҳбарии Мирия Шоблум вобаста ба омӯзиш ва таҳлили лоиҳаҳо дар соҳаи тандурустӣ дар Тоҷикистон қарор дорад.
26 апрели соли равон вобаста ба анҷом расидани миссия намояндагони Бонки ҷаҳонӣ таҳти роҳбарии хонум Мирия Шоблум бо вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода мулоқот намуданд.
Вазири тандурустӣ ва ҳифзи иҷтимоии аҳолии мамлакат нахуст баҳри саҳм гузоштан дар пешрафти соҳаи тандурустӣ ва ҳифзи иҷтимоии кишвар аз номи Ҳукумати Ҷумҳурии Тоҷикистон ва роҳбарияти вазорат ба Бонки ҷаҳонӣ изҳори миннатдорӣ баён намуд.
Маврид ба зикр аст, ки миссияи Бонки ҷаҳонӣ ба вилоятҳои Хатлону Суғд, минтақаи Рашт сафар намуда, дар баробари шиносоӣ бо фаъолияти лоиҳаҳои соҳаи тандурустӣ, инчунин бо намояндагони вазорату идораҳои кишвар низ мулоқот намуд.