Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Ҷиҳати боз ҳам беҳтар намудани сатҳ ва сифати хизматрасонии тиббӣ ба аҳолӣ имрӯз, 7 майи соли равон ба минтақаи Кӯлоби вилояти Хатлон нақлиётҳои сайёри тиббии калонҳаҷм тақдим карда шуд.

Дар маросими расмии тақдими нақлиётҳои мазкур, ки имрӯз дар шаҳри Кӯлоб баргузор гардид, муовини Сарвазири Ҷумҳурии Тоҷикистон Матлубахон Сатториён, вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода, Сафири Шоҳигарии Арабистони Саудӣ дар Ҷумҳурии Тоҷикистон Абдулраҳмон Ал-Решайдон, раиси шаҳри Кӯлоб Назарзода Бахтиёр, намояндагони Барномаи хайриявии (Шоҳ Абдулло ибн Абдулазиз) Бонки Исломии Рушд, ширкати «Нормека»-и Норвегия, ки ҳамчун оператори пешниҳоди маҷмӯи тиббии сайёр интихоб намудааст ва  дигар шахсони расмӣ иштирок намуданд.

Зимни суханронии хеш ҳозирин аз ҳамкориҳои мутақобилан судманди Ҷумҳурии Тоҷикистон бо Шоҳигарии Арабистони Саудӣ изҳори қаноатмандӣ намуда, иброз доштанд, ки тақдим ва дастрас гардидани нақлиётҳои сайёри тиббии мазкур баҳри боз ҳам хубтару беҳтар намудани хизматрасонии тиббӣ ба аҳолии минтақаи Кӯлоб саҳми назаррас хоҳанд гузошт.

Баъдан меҳмонон аз клиникаҳои сайёр, ки воситаҳои нақлиёти калонҳаҷм буда, дар онҳо ҳуҷраҳои зарурӣ, аз ҷумла бемориҳои чашм, дил, акушерӣ, ташхисҳои фаросавтӣ, томографияи компютерӣ, ташхиси нурии ғадуди ширӣ, озмоишгоҳ, рентгени рақамӣ, барои даруннигарӣ — индоскопияи хурд, ҳуҷраи баъди ҷарроҳӣ, ҷойи кории табибон, ошхона ва дигар ҳуҷраҳои ёрирасон ҷойгир мебошанд, шинос шуданд.

Дар идомаи сафар меҳмонон ба  Оромгоҳи Мир Сайид Алии Ҳамадонӣ ташриф оварда, дар ин ҷо бо гӯшаи ашёҳои таърихӣ ва маҳсули ҳунарҳои мардумии минтақа шинос шуданд.

Мавриди зикр аст, ки 27 октябри соли 2014 байни Ҷумҳурии Тоҷикистон ва Бонки исломии рушд вобаста ба татбиқи маблағгузории бебозгашт барои харидорӣ ва истифодаи клиникаҳои сайёр дар минтақаҳои деҳоти Ҷумҳурии Тоҷикистон созишнома ба имзо расонида шуда буд. Ин кӯмак аз ҷониби «Муассисаи шоҳ Абдуллоҳ оид ба имдод ва кӯмакҳои башардӯстона» тавассути Бонки исломии рушд тақдим гардидааст.