24 майи соли равон дар доираи сафари корӣ ба Ҷумҳурии Тоҷикистон ноиби губернатори шаҳри Санкт-Петербурги Федератсияи Россия Олег Эргашев, ки худ табиб аст, бо ҳамроҳии мутахассисони соҳаи тибби шаҳри мазкур ба Муассисаи давлатии “Маҷмааи тандурустии “Истиқлол” ташриф овард.
Аснои боздид ноиби губернатори шаҳри Санкт-Петербург Олег Эргашев бо пизишкони тоҷик суҳбат карда, инчунин бо фаъолияти шӯъбаи ангиографияи маҷмаа шинос шуд.
Номбурда бо табибони тоҷик оид ба усулҳои табобати бемориҳои гуногун, аз ҷумла стентмонии рагҳои хунгард мубодилаи афкор намуда, ҷонибҳо зимни суҳбат вобаста ба табобати бемории мағзи сар низ таваҷҷуҳ зоҳир карданд.
Дар маҷмӯъ, меҳмонон ба фаъолияти Маҷмааи тандурустии “Истиқлол” ва дастгоҳу таҷҳизоти утоқи ҷарроҳии ин муассиса баҳои баланд дода, афзуданд, ки дар ин ҷо имкони табодули таҷриба миёни табибони шаҳри Душанбе ва Санкт-Петербург мавҷуд аст.
Инчунин дар маҷлисгоҳи маҷмаа бо иштироки табибони Санкт-Петербург ва ҷарроҳону неопаталогҳои шаҳри Душанбе дар мавзӯҳои “Ҷарроҳии дил” ва “Нигоҳубини навзодон” семинар-машварати омӯзишӣ доир гардид.
Бояд зикр намуд, ки яке аз бандҳои асосии нақшаи чорабиниҳо «Харитаи роҳ» оид ба татбиқи Созишнома байни мақомоти иҷроияи ҳокимияти давлатии шаҳри Душанбеи Ҷумҳурии Тоҷикистон ва Ҳукумати шаҳри Санкт-Петерубрги Федератсияи Россия барои солҳои 2022-2026 ин ҳамкорӣ дар соҳаи тандурустӣ мебошад.
![](https://moh.tj/wp-content/uploads/2018/04/8678.jpg")
