Имрӯз, 27 майи соли равон дар меҳмонхонаи Ҳайат Реҷенсии шаҳри Душанбе таҳти унвони “Муколамаи сиёсии сатҳи баланд оид ба таҳкими кӯмаки аввалияи тиббию санитарӣ (КАТС) дар Тоҷикистон” мизи мудаввар баргузор гардид, ки дар он муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода, роҳбари Дафтари Бюрои минтақавии ТУТ дар шаҳри Алмаатои Ҷумҳурии Қазоқистон хонум Мелита Якаб, роҳбари Намояндагии Ташкилоти умумиҷаҳонии тандурустӣ дар Ҷумҳурии Тоҷикистон Виктор Олшавский, роҳбарони як қатор муассисаҳои КАТС-и шаҳри Душанбе ва шарикон оид ба рушд иштирок намуданд.
Муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода ба шарикон оид ба рушд барои дастгирии пайвастаи соҳаи тандурустии мамлакат изҳори миннатдорӣ баён карда, чорабинии мазкурро як қадами устувор дар самти густариши ҳамкориҳои судманди вазорат бо шарикон оид ба рушд арзёбӣ намуд.
Дар чорабинӣ махсус қайд гардид, ки кумаки аввалияи тиббию санитарӣ яке аз бахшҳои муҳими соҳаи тандурустӣ ба шумор рафта, саҳми он дар таъмини солимии аҳолӣ муҳиму назаррас мебошад.
Дар идома як қатор иштирокчиён доир ба паҳлуҳои гуногуни мавзӯъи мазкур баромад намуданд.
Маврид ба зикр аст, ки 26 майи соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода ва роҳбари Намояндагии Ташкилоти умумиҷаҳонии тандурустӣ дар Ҷумҳурии Тоҷикистон Виктор Олшавский ба Изҳороти муштараки Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва шарикон оид ба рушд ҷиҳати тақвияти кӯмаки аввалияи тиббию санитарӣ дар Ҷумҳурии Тоҷикистон имзо гузоштанд, ки дар он афзалият ва роҳҳои таҳкими минбаъдаи КАТС дар Тоҷикистон баён шудаанд.