Бо мақсади беҳтар намудани сифат ва дастрасии хизматрасонии тиббӣ ба аҳолӣ дар доираи ҳамкориҳои дуҷониба аз ҷониби табибони кишвари Швейтсария ва дар ҳамкорӣ бо табибони тоҷик дар Маҷмааи тандурустии “Дӯстии Тоҷикистону Ӯзбекистон” як қатор усулҳои нави ташхис ва табобат ворид карда шуданд.
Аз 23 октябр то 2 ноябри соли равон дар муассисаи мазкур аз ҷониби табибони Тоҷикистону Швейтсария ба беморони дорои бемориҳои сангдори талхадон, руда, беморони гирифтори чурраҳои шикам ва ғайра ба таври ройгон ҷарроҳиҳои усулҳои пешрафтаи ҳозиразамон гузаронида шуд. Ба ғайр аз ин, табибони Швейтсария ҳамарӯза дар ташхису гардиши беморон дар шуъбаҳои муассиса иштирок намуда, оиди табобати беморон ба табибони муассиса маслиҳату машварат пешниҳод менамоянд.
Инчунин, аз ҷониби меҳмонон ба табибон ва кормандони миёнаи тиббии муассиса дарсҳои омӯзишию назариявӣ ва амалӣ гузаронида шуда, ба онҳо усулҳои ҷарроҳии бехавф бо истифода аз таҷҳизоти ҳозиразамони эндоҷарроҳӣ омӯзонида шуданд.
Ҳамзамон табибони Швейтсария ба муассисаи номбурда як қатор асбобҳои ҷарроҳии эндоскопӣ ва як дастгоҳи ташхисии фаросавтӣ тақдим намуданд.