Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Дирӯз дар пойтахти кишвар шаҳри Душанбе, мусобиқаи панҷуми  тенниси рӯимизӣ байни дастаҳои занонаи муассисаҳои тандурустӣ ва ҳифзи иҷтимоии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҷамъбаст гардид.

Мусобиқаи мазкур бо ибтикори Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо мақсади тарғиби ташаккули тарзи ҳаёти солим,   инчунин  дар доираи нақшаи чорабиниҳо бахшида ба соли «Соли ҷавонон», ҷашни 20-солагии «Ваҳдати миллӣ», зодрӯзи олим, файласуф ва ҳакими тоҷик Абӯалӣ ибни Сино, ҳамзамон  бахшида ба рӯзи иди касбии кормандони тибби Ҷумҳурии Тоҷикистон ташкил ёфтааст.

Мусобиқа аз рӯи шартҳои ба худ хос баргузор гардида ҷойи аввал насиби Маркази саломатии шаҳрии №9-и шаҳри Душанбе гардида, ба гирифтани мақоми  дуюм  Муассисаи давлатии  «Маркази Ҷумҳуриявии илмии  хун» мушарраф гардид. Ҷойи сеюм бошад ба кормандони «Маркази миллии тиббии Ҷумҳурии Тоҷикистон»-шаҳраки “Шифобахш”сарзовор дониста шуд.

Дар фарҷоми чорабинӣ ба ғолибони мусобиқа туҳфаҳои хотиравӣ тақдим карда шуд.

Мусобиқаҳои дигари варзишӣ идома доранд ва дар назар аст, ки 18 август, дар рӯзи таҷлили Иди касбии табибон ҷамъбаст карда мешаванд.