Дар рӯзҳои таҷлили 26-солагии Истиқлолияти давлатии Ҷумҳурии Тоҷикистон бо иқдоми бевоситаи Ҳукумати Ҷумҳурии Тоҷикистон ва бо ибтикори Вазорати тандурустӣ ва ҳифзи иҷтимоии Ҷумҳурии Тоҷикистон дар беморхонаи шаҳри Хоруғ шуъбаи гемодиализ кушода шуд.
Ба иттилои дастрас шуъба бо дастгоҳи гемодиализатор таъмин карда шудааст, ки вазифаи асосии он тоза кардани хуни беморони мубтало ба дарди шадиди гурда мебошад.
Зимни ифтитоҳи шуъбаи гемодиализ раиси Вилояти мухтори кӯҳистони Бадахшон Шодихон Ҷамшед аз пешрафти соҳаи тандурустӣ дар даврони 26 соли истиқлолият ёдовар шуда, баён дошт, ки дар ин муҳлати кӯтоҳ дар вилоят 38 лоиҳаи хурду бузург маблағгузорӣ гардиданд. Ҳоло сохтмони бинои беморхонаи рӯҳӣ ва диспансери наркологӣ дар ноҳияи Роштқалъа, беморхонаи чорошёна дар ноҳияи Шуғнон бо маблағгузории Дирексияи сохтмони иншооти ҳукуматии назди Дастгоҳи иҷроияи Президенти Ҷумҳурии Тоҷикистон идома дорад ва дар назар аст, ки то охири ҳамин сол ин биноҳо мавриди истифода қарор гиранд.
![](https://moh.tj/wp-content/uploads/2018/04/8678.jpg")
