Вазорати тандурустӣ ва ҳифзи иҷтимоии аҳолии Ҷумҳурии Тоҷикистон сару садоҳоро вобаста ба доман паҳн намудани бемории зардпарвин дар баъзе аз ноҳияҳои вилояти Суғд мавриди таҳлилу баррасӣ қарор дод.
Аз натиҷаи таҳлилҳо бармеояд, ки тибқи омори расмӣ дар 8 моҳи соли 2017 дар ҳудуди шаҳру ноҳияҳои вилояти Суғд ҳамагӣ 1388 ҳодисаҳои зардпарвини вирусии намуди “А” ба қайд гирифта шудааст, ки ин нишондод нисбат ба ҳамин давраи соли 2016 281 ҳодиса камтар мебошад. Дар ин муддат бемории мазкур дар ноҳияҳои Айнӣ-5 ҳодиса, Ашт-38 ҳодиса, Деваштич-81 ҳодиса, Зафаробод-12 ҳодиса, Кӯҳистони Мастчоҳ-8 ҳодиса, Мастчоҳ- 1 ҳодиса, Спитамен-31 ҳодиса, Ҷ.Расулов-92 ҳодиса, Шаҳристон-39 ҳодиса, шаҳри Гулистон-24 ҳодиса, Истаравшан-41 ҳодиса, Истиқлол-14 ҳодиса, Конибодом-105 ҳодиса, Панҷакент-75 ҳодиса ба қайд гирифта шудааст.
Мавриди зикр аст, ки тибқи таҳлил ва мушоҳидаҳои эпидемиологӣ бемории зардпарвини вирусии намуди “А” сирояти дорои хусусияти мавсимӣ буда, хурӯҷи он асосан ба фасли тобистону тирамоҳ рост омада, бақайдгирии ин беморӣ бисёртар дар байни гурӯҳҳои осебпазир (кӯдакони синни томактабию мактабӣ) мушоҳида карда мешавад.
Сабабҳои асосии паҳншавии ин беморӣ агар аз як тараф гардиши табиии ин намуди вирус дар табиат бошад, аз тарафи дигар дар риоя нагардидани гигиенаи шахсӣ аз тарафи аҳолӣ аст.
Аз ҷониби зерсохторҳои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо мақсади пешгирии пайдоиш ва паҳншавии бемории зардпарвини вирусии намуди “А” чораҳои зиддиэпидемикӣ ташкил гардида, ҷиҳати саривақт анҷом додани тадбирҳои дезинфексионӣ миқдори зарурии маводҳои безараргардонӣ ҷудо карда шудааст.
Айни ҳол вазъи бемории зардпарвини вирусии намуди “А” дар ҷумҳурӣ мӯътадил буда, таҳти назорат қарор дода шудааст.