Санаи 13 феврали соли равон вохӯрии вазири тандурустӣ ва ҳифзи иҷтимоии аҳолии Ҷумҳурии Тоҷикистон Олимзода Насим Хоҷа бо Сафири фавқуллода ва мухтори Ҷумҳурии Озарбойҷон дар Ҷумҳурии Тоҷикистон Ҳасан Дилсӯз оглу Мамедзаде баргузор гарид.
Бояд қайд намуд, ки мақсади вохӯрии мазкур бо Сафири навтаъиншудаи Ҷумҳурии Озарбойҷон дар Ҷумҳурии Тоҷикистон шиносоӣ ва муҳокимаи масъалаҳои ҳамкории минбаъда дар соҳаи тандурустӣ ва ҳифзи иҷтимоии аҳолӣ бо Ҷумҳурии Озарбойҷон буда, ҳамзамон дар рафти вохӯрӣ аз пешравӣ ва рушди соҳаи тандурустии ду кишвари бо ҳам дӯст Тоҷикистону Озарбойҷон дар ин раванд ба роҳ мондани ҳамкориҳои мутақобилан судманди дуҷониба баррасӣ гардид.
Зимни вохурӣ Насим Олимзода, вазири тандурустӣ ва ҳифзи иҷтимоии аҳолии Ҷумҳурии Тоҷикистон қайд намуд, ки соҳаи ҳифзи солимии аҳолӣ – яке аз самтҳои афзалиятноки рушди иқтисодиёти давлат ба шумор рафта, он дар даҳсолаи охир ба дастовардҳои назаррас ноил гаштааст, ки ин аз сиёсати хирадмандонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вобаста ба масъалаҳои тандурустӣ ва ҳифзи иҷтимоии аҳолии кишвар шаҳодат медиҳад.
Қайд кардан ба маврид аст, ки дар натиҷаи ҳамкории дуҷониба дар самти хизматрасониҳои баландихтисоси тиббӣ ба 11 нафар шаҳрванди Ҷумҳурии Озарбойҷон дар Тоҷикистон ҷарроҳии пайвандисозии узвҳо гузаронида шуда, оянда умед аст, ки ҳамкорӣ дар ин самт боз ҳам вусъат меёбад.
Насим Олимзода зимни суханронии хеш ҳамзамон иброз намуд, ки; “Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва ҳамаи сохторҳои он дар ҳамкорӣ бо Ҷумҳурии Озарбойҷон ниёз дорад ва вохӯрии имрӯза фурсати муносибе хоҳад буд, барои машварат ва гуфтугӯ, ҷиҳати рушду равнақ додани ҳамкориҳои давлатҳо дар раванди ҳифзи сиҳатии аҳолии ду кишвари бо ҳам дӯст”.