Имрӯз, 16 декабри соли равон таҳти роҳбарии муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Зулфия Абдусаматзода оид ба баҳодиҳии лоиҳаи “Модари солим-кӯдаки солим”, ки 12 шаҳру ноҳияҳои вилояти Хатлон, аз ҷумла Левакант, Кушониён, Шаҳритус, Қубодиён, Дӯстӣ, Носири Хусрав, Ёвон, А.Ҷомӣ ва Ҷ.Балхиро дарбар мегирад, ҷаласаи корӣ доир гардид, ки дар он мушовирони маҳаллӣ иштирок намуданд.
Тавре зикр гардид, мақсади асосии татбиқи лоиҳаи мазкур беҳтар намудани вазъи ғизо, пешгирӣ намудани беморшавӣ ва фавти модарон ва кӯдакон ба шумор меравад. Бинобар ин, пеш аз оғози татбиқи лоиҳаи зикргардида, ки дар соли 2021 дар назар аст, гузаронидани баҳодиҳӣ ба нақша гирифта шудааст.
Таъкид гардид, ки баҳодиҳии лоиҳаи мазкур моҳҳои январ ва феврали соли 2021 бояд гузаронида шавад. Баҳодиҳӣ дар ду сатҳ: шӯъбаҳои таваллудӣ ва кӯдаконаи беморхонаҳои марказии шаҳру ноҳияҳо ва дар сатҳи марказҳои саломатии шаҳру ноҳиявӣ доир хоҳад гашт.