Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Субҳи имрӯз дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, ҷаласаи навбатии ҳайати мушовараи ин ниҳод доир гардид. Ҷаласаи мазкурро Саида Умарзода, муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон роҳбарӣ намуда, дар кори он дигар муовинони вазир, сардорони раёсатҳои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, роҳбарият ва намояндагони муассисаҳои зертобеи вазорат, сардорон ва сармутахассисони Раёсатҳои тандурустии вилоятҳои Суғду Хатлон, ВМКБ ва шаҳри Душанбе иштирок намуданд.

Дар кори ҷаласаи навбатии ҳайати мушовараи  Вазорати тандурустӣ ва ҳифзи иҷтимоии аҳолии Ҷумҳурии Тоҷикистон  масъалаҳои зерин мавриди таҳлилу баррасӣ ва омӯзиш қарор дода шуданд.

–     Таҳлили фаъолияти бахшу шӯъбаҳои наҷоти калонсолон ва кӯдакона дар муассисаҳои давлатии тандурустии ҷумҳурӣ;

–    Натиҷаи таҳлили ҳолатҳои  фавти беморон дар муассисаҳои сатҳи  беморхонавии ҷумҳурӣ;

Вобаста ба масъалаи якуми ҷаласаи навбатии ҳайати мушовараи  Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, таҳти мавзуоти   таҳлили вазъи воқеии фаъолияти бахшҳои наҷот дар ҷумҳурӣ, мушкилоти дар ин самт ҷойдошта ва бо мақсади дар сатҳи зарурӣ ба роҳ мондани ёрии эҳёгарӣ ва вобаста ба он маърӯзаҳо шунида шуда, дар доираи он гуфтушунид сурат гирифт.

Бо мақсади дар амал татбиқи намудани Кодекси тандурустии Ҷумҳурии Тоҷикистон, «Стратегияи миллии солимии аҳолии Ҷумҳурии Тоҷикистон барои солҳои 2010 – 2020», «Дурнамои пешгирӣ ва назорати бемориҳои ғайрисироятӣ ва осеббардорӣ дар Ҷумҳурии Тоҷикистон барои солҳои 2013 – 2023», аз масъалаҳои дигаре буданд, ки дар кори ҷаласаи навбатии ҳайати мушовараи ин ниҳод мавриди бозомӯзӣ қарор дода шуданд.

Дар фарҷоми чорабинӣ, вобаста ба беҳтар намудани сифати хизматрасонии тиббӣ ва паст намудани нишондодҳои фавти беморхонагӣ қарорҳои дахлдор қабул гардида, ҷиҳати дар амал татбиқ намудани онҳо ба иштирокчиёни чаласа дастур ва супоришҳои мушахас дода шуд.