Роҳбарияти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо мақсади аз наздик шиносоӣ пайдо намудан бо вазъи беморхонаҳо ва марказҳои саломатии шаҳру ноҳияҳои кишвар гаштҳои рӯзона ва шабонаро ба роҳ мондааст.
Бо ин мақсад вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода шаби 3 июни соли равон аз рафти фаъолияти хизматрасонии тиббии Муассисаи давлатии “Маркази тиббии шаҳрии №1 ба номи Карим Ахмедов”-и шаҳри Душанбе дидан намуд.
Зимни боздид вазири тандурустӣ ва ҳифзи иҷтимоии аҳолии кишвар бо фаъолияти муассисаи мазкур шинос шуда, оид ба рафъи мушкилиҳои мавҷуда ба масъулин дастуру супоришҳои мушаххас дод. Ҳамзамон, дар ин ҷо номбурда бо як қатор беморон ва наздикони онҳо суҳбати озоду ошкоро анҷом дода, доир ба хизматрасонии тиббӣ аз онҳо пурсон шуд.
Бояд гуфт, ки ҳадаф аз боздиди роҳбарияти Вазорати тандурустӣ ва ҳифзи иҷтимоии Ҷумҳурии Тоҷикистон аз муассисаҳои тандурустӣ-ин пеш аз ҳама шиносоии бевосита пайдо намудан бо фаъолияти онҳо, таҳлили вазъи соҳа, суҳбати озоду ошкоро бо беморон ва наздикони онҳо ва дар ин замина боз ҳам хубтару беҳтар намудани хизматрасонии тиббӣ ба аҳолӣ мебошад.
![](https://moh.tj/wp-content/uploads/2018/04/8678.jpg")
