13 январи соли 2023 дар вазорат ҷаласаи назоратии назди муовини вазир, сарпарасти соҳаи ҳифзи иҷтимоии аҳолӣ Шодихон Ҷамшед оид ба рафти иҷрои Қарори Ҳукумати Ҷумҳурии Тоҷикистон аз 9 декабри соли 2022, №597 “Дар бораи пардохт намудани кумаки яквақта ба гурӯҳҳои осебпазири аҳолӣ” баргузор гардид, ки дар он мудирони шуъбаҳои ҳифзи иҷтимоии аҳолии вилоятҳо ва шаҳру ноҳияҳои мамлакат ба таври маҷозӣ (онлайн) иштирок намуданд.
Нахуст муовини вазир Шодихон Ҷамшед оид ба фаъолияти бахшҳои ҳифзи иҷтимоии аҳолӣ дар расонидани кумакҳои яквақта ба оилаҳои осебпазири аҳолӣ суханронӣ намуда, барои минбаъд ҷоннок намудани масъалаи мазкур ва инчунин вобаста ба муроҷиати ҳатмии шаҳрвандон оиди саривақт ба иҷро расонидани қарори мазкур маълумот дод.
Баъдан, намояндагони Бонки амонатгузории Ҷумҳурии Тоҷикистон “Амонатбонк”, Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон ва Агентии давлатии ҳифзи иҷтимоии аҳолӣ низ вобаста ба рафти татбиқи қарори мазкур маълумот пешниҳод намуданд.
Иттилоъ дода шуд, ки тибқи қарори болозикр механизми он дар тамоми 68 шаҳру ноҳияҳои ҷумҳурӣ мавриди амал қарор гирифта истодааст.
Инчунин, корҳои назаррас аз тарафи сардорону мудирони бахши ҳифзи иҷтимоӣ ба роҳ монда шуда, айни замон амалӣ гардида истодаанд.
Дар анҷом ба бахшҳои ҳифзи иҷтимоии мақомоти иҷроияи ҳокимияти давлатии вилоятҳо ва шаҳру ноҳияҳо супориш дода шуд, ки дар якҷоягӣ бо дигар сохторҳои алоқаманд корҳои фаҳмондадиҳиро дар байни аҳолӣ боз ҳам пурзӯр намоянд.
![](https://moh.tj/wp-content/uploads/2018/04/8678.jpg")
