Баҳри баланд бардоштани сатҳи огоҳии ҳуқуқҳои кӯдакон, тансиҳативу рушди солимии ояндаи ҷомеа, имрӯз дар Беморхонаи шаҳрии кӯдаконаи бемории сил ба муносибати Рӯзи байналмилалии ҳифзи кӯдакон, чорабинии идона баргузор гардид.
Дар чорабинӣ раиси ноҳияи Исмоили Сомонӣ Самӣ Шариф, сартабиби беморхона Ҳусензода Ҳилолиддин Ҳусейн, ташкилоти башардӯстонаи «Духтурон бидуни марз», ва ташкилоти ғайридавлатии Ҳилоли Аҳмар ширкат варзиданд.
Дар оғози чорабинӣ раиси ноҳия кӯдакони мубталои бемории силро табрик намуда, пасон сартабиби беморхона Ҳилолиддин Ҳусейн тӯҳфаҳо ва бозичаҳои хотирмонро тақдими кӯдакон намуд.
Қайд кардан зарур аст, ки бо дастгирии бевоситаи вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва сартабиби беморхонаи номбурда дар ҳамкорӣ бо ташкилоти башардӯстонаи «Духтурон бидуни марз» ва «Ҳилоли Аҳмар» барои кӯдакони гирифтори бемории сил тӯҳфаҳо харидорӣ карда шуда, дастархони идона ороста шуд.
Дар чорабинии мазкур гурӯҳи калони ҳунармандон табъи ҳозиринро болида гардонданд.