Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Рӯзҳои 25-26 октябри соли 2023 дар меҳмонхонаи “Ҳаят Реҷенсӣ”-и шаҳри Душанбе конфронси 7-уми минтақавӣ оид ба назорати ҳамгироишудаи бемории сил дар давлатҳои Осиёи Марказӣ баргузор гардид.

Дар конфронс коршиносон ва роҳбарони соҳаи тандурустӣ аз давлатҳои гуногун ҷамъ омада, давоми ду рӯз усулҳои муосири ташхис, табобат ва пешгирии бемории сил ва сили  ба доруҳо устуворро (ДТБ) баррасӣ намуданд.

Конфронс бо маросими тантанавӣ оғоз гардида, дар он муовинони вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода, Абдухолиқ Амирзода, Хонум Кэрри Ли, Кордори муваққатӣ, Сафорати Иёлоти Муттаҳидаи Амрико дар Ҷумҳурии Тоҷикистон, Давран Файзан, Портфолио менеҷери Фонд, шӯъбаи идоракунии грантҳо дар минтақаи Аврупои Шарқӣ ва Осиёи Марказӣ, Хазинаи глобалии мубориза бо ВНМО, сил ва вараҷа ва дигарон иштирок намуданд.

Муовини аввали Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода иброз намуд, ки сарфи назар аз пешравӣ дар самти пешгирӣ ва табобати бемории сил он ҳамчун хатари ҷиддӣ ба саломатӣ ва ҳаёти инсон боқӣ мемонад.

«Мо бо мушкилот, аз қабили муқовимати антибиотикҳо, омилҳои иҷтимоии бемориҳо ва дастрасӣ ба хизматрасонии босифати тиббӣ рӯ ба рӯ мешавем. Солҳои охир дар Тоҷикистон мизони беморӣ ва фавт аз бемории сил бомуваффақият коҳиш ёфтааст. Ин муваффақият аз талошҳои Тоҷикистон ва сол то сол беҳтар шудани сатҳу сифати ташхис ва табобат гувоҳӣ медиҳад. Барномаи самараноки мубориза бар зидди сил иқтидори пурқуввати ташхисгоҳҳоро барои ташхиси дақиқ ва мониторинги натиҷаҳои табобат талаб менамояд. Тоҷикистон ба таҳкими низомҳои ташхисгоҳҳо (лаборатория) тавассути сармоягузорӣ ба технологияҳои муосир ва омӯзиши кадрҳо афзалият медиҳад”,- афзуд номбурда.

Ғафур Муҳсинзода тазаккур дод, ки солҳои охир дар Тоҷикистон технологияҳои инноватсионии ташхиси бемории сил ҷорӣ шудаанд. Бо истифодаи  технологияи GeneXpert ва Baktek дар ташхиси бемории сил, бахусус муайян намудани штаммҳои ба дору тобовар  ба пешравиҳои назаррас ноил гаштем.

Дар доираи конфронс ҳамчунин ҷаласаҳои ҳамрадиф доир мегарданд, ки дар он иштирокчиён мавзӯъҳои навовариҳо дар ташхис, ошкор ва ташхиси бемории сил ва таҳкими низоми тандурустӣ ва маблағгузорӣ дар мубориза бо бемории силро баррасӣ менамоянд.

Дар конфронс коршиносон ва намояндагон аз панҷ кишвари Осиёи Марказӣ: Ҷумҳуриҳоии Қазоқистон, Қирғизистон, Тоҷикистон, Туркманистон ва Узбакистон ширкат доранд. Ин хусусияти васеи байниминтақавии чорабиниро таъкид намуда, аҳамияти талошҳои муштаракро барои мубориза бо бемории сил таъкид мекунад. Иштироки намояндагони кишварҳои гуногун ба табодули дониш ва таҷриба мусоидат намуда, ба таҳия ва татбиқи стратегияҳои муштараки пешгирӣ ва табобати бемории сил, пурзӯр намудани мубориза бо ин бемории вазнин мусоидат мекунад.