Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

18 ноябри соли равон дар шаҳри Душанбе оид ба масъалаҳои “Татбиқи фаъолияти марказҳои дастгирии оила ва кӯдак (хонаи кӯдакон) мутобиқи Низомномаи нав” мизи мудаввар доир гардид, ки дар он муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Зулфия Абдусаматзода, директорони марказҳои дастгирии оила ва кӯдак, намояндагони раёсатҳои молияи  шаҳрҳои Хуҷанд ва Истаравшан иштирок намуданд.

Зулфия Абдусаматзода, муовини вазири тандурустӣ ва ҳифзи иҷтимоии аҳолии мамлакат зимни ифтитоҳи мизи мудаввар иброз намуд, ки масъалаи ҳифзи саломатии модарон ва кӯдакон яке аз масъалаҳои  афзалиятноки фаъолияти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба шумор рафта,  ба соҳа аз ҷониби давлат ва Ҳукумати кишвар таваҷҷуҳи махсус зоҳир карда мешавад.

Зикр гардид, ки дар Ҷумҳурии Тоҷикистон барои таъмини ҳуқуқ, аз ҷумла хизматрасонии тиббӣ ва тарбияи ҳамаҷонибаи кӯдакон  шароит ва имконоти мусоид муҳайё гардида, ҳамасола дар кишвар даҳҳо муассисаҳои тандурустии кӯдакона, марказҳои солимгардонӣ ва майдончаҳои варзишӣ сохта ба истифода дода мешаванд.

Инчунин, вобаста ба раванди табдилҳидии хонаҳои кӯдакони соҳаи тандурустӣ ба марказҳои дастгирии оила ва кӯдак намояндаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Азиза Хоҷаева баромад намуд.

Номбурда  иброз дошт, ки бо фармоиши Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Низомномаи намунавии Муассисаи давлатии “Маркази дастгирии оила ва кӯдак” таҳия гардида, он соли 2018 ба тасвиб расид, ки табдилдиҳии хонаҳои кӯдакони амалкунандаро ба марказҳои дастгирии оила ва кӯдак ҳамчун алтернатива ба шаклҳои нигоҳубин дар муассисаҳои будубоши доимӣ ифода менамояд.

Дар идомаи мизи мудаввар як қатор иштирокчиён низ доир ба масъалаҳои табдилдиҳии хонаҳои кӯдакон ба марказҳои дастгирии оила ва кӯдак баромад намуданд.