Бахшида ба оғози фаъолияти истироҳатгоҳ ва осоишгоҳҳои зертобеи Агентии давлатии ҳифзи иҷтимоии аҳолии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар Муассисаи давлатии «Осоишгоҳи табобатии собиқадорони ҷангу меҳнати «Харангон»-и ноҳияи Варзоб чорабинии фароғатӣ доир гардид, ки дар он роҳбарияти муассиса, намояндагони Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Агентии давлатии ҳифзи иҷтимоии аҳолии Ҷумҳурии Тоҷикистон, Вазорати меҳнат, муҳоҷират ва шуғли аҳолии Ҷумҳурии Тоҷикистон иштирок намуданд.
Зимни оғози барномаи фарҳангӣ зикр гардид, Ҳукумати Ҷумҳурии Тоҷикистон барои истироҳат ва табобати собиқадорон аз рӯзҳои аввали соҳибистиқлолӣ тадбирҳои муҳимро амалӣ намудааст, ки имрӯзҳо баҳри фароғати собиқадрони ҷангу меҳнати кишвар дар истироҳатгоҳҳои зертобеи Агентии давлатии ҳифзи иҷтимоии аҳолии Вазорати тандурустӣ ва ҳифзи иҷтимоии аҳолии мамлакат тамоми шароит ва имконоти мусоид фароҳам оварда шудааст.
Дар барномаи фарҳангӣ ҳунармандони хушсадои ноҳияи Варзоб ва ансамбли рақсии “Лаъл”-и Вазорати меҳнат, муҳоҷират ва шуғли аҳолии Ҷумҳурии Тоҷикистон бо суруду таронаҳои дилнишин ва рақсҳои мавзун табъи ҳозиринро шод намуданд.