Аз 7 то 10-уми сентябри соли равон дар шаҳри Милани Ҷумҳурии Италия 46-ум Конгресси байналмилалӣ оид ба ғизои клиникӣ ва мубодилаи моддаҳо баргузор гардид, ки дар он мутахассисони соҳаи ғизо аз як қатор кишварҳои олам иштирок намуданд.
Дар ин чорабинии сатҳи баланд сармутахассиси соҳавии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон оид ба ғизо Нушервони Билол иштирок ва дар мавзӯи “Беҳтар намудани идоракунии норасоии ғизо ҳангоми маҳдудияти захираҳо: баланд бардоштани иқтидорӣ кадрӣ оид ба ғизо” баромад кард.
Нушервони Билол дар баромади худ таъкид намуд, ки дар Ҷумҳурии Тоҷикистон сол то сол нишондиҳандаи камғизоӣ коҳиш ёфта, мушкилотҳои дигари соҳаи ғизо, аз ҷумла боло рафтани нишондиҳандаҳои бемориҳои ғайрисироятии вобаста ба ғизо, ба монанди фарбеҳӣ, диабети қанд, бемориҳои ишемияи дил ва баъзе навъҳои саратон нигаронкунанда мебошанд.
Бо назардошти муҳимияти масъала, номбурда дар идомаи баромади худ омода намудани мутахассисони ботаҷрибаро дар дохил ва хориҷи кишвар ҷиҳати омӯзиши масъалаҳои вобаста ба ғизои аҳолӣ ва бемориҳои вобаста ба он муҳим арзёби намуд.
![](https://moh.tj/wp-content/uploads/2018/04/8678.jpg")
