Роҳбарияти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҷиҳати беҳтар намудани сатҳ ва сифати хизматрасонии тиббӣ ба аҳолӣ тамоми кӯшиш ва талоши хешро равона сохта, ҷиҳати шиносоӣ пайдо намудан бо фаъолияти муассисаҳои тандурустӣ ва суҳбати озоду ошкоро анҷом додан бо шаҳрвандон доир ба сатҳ хизматрасонии тиббӣ гаштҳои шабона ва рӯзонаро ба роҳ мондааст.
Дар доираи ин иқдом имрӯз, 25 июни соли равон бо мақсади суҳбати озоду ошкоро анҷом додан бо шаҳрвандон ва расидагӣ намудан ба масъалаву мушкилоти онҳо доир ба масъалаҳои тандурустӣ ва ҳифзи иҷтимоии аҳолӣ тибқи супориши вазири тандурустӣ ва ҳифзи иҷтимоии аҳолии Ҷумҳурии Тоҷикистон муовини вазири тандурустӣ ва ҳифзи иҷтимоии аҳолии мамлакат Зулфия Абдусаматзода ба шаҳри Ҳисор сафар намуда, бо фаъолияти Беморхонаи марказӣ ва Маркази саломатии шаҳри мазкур шинос шуд.
Пас аз шиносоӣ бо фаъолияти муассисаҳои тандурустӣ номбурда қабули сайёри шаҳрвандон доир намуда, бо онҳо суҳбати озоду ошкоро анҷом дод.
Баъд аз шунидани муроҷиати шаҳрвандон ҷиҳати ҳалли масъалаҳои эшон аз ҷониби муовини вазири тандурустӣ ва ҳифзи иҷтимоии аҳолии мамлакат ба масъулини тандурустии шаҳри Ҳисор дастуру супоришҳои мушаххас дода шуд.
Қайд кардан ба маврид аст, ки дар сиёсати давлат ва Ҳукумати мамлакат беҳтар намудани сатҳ ва сифати хизматрасонии тиббӣ ба аҳолӣ яке аз самтҳои муҳим ба шумор рафта, ҷиҳати фароҳам овардани шароити арзандаи фаъолият барои табибони кишвар имрӯзҳо дар муассисаҳои тандурустӣ шароит ва имконоти мусоид муҳайё карда шудааст.