Бо ибтикори Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, дар доираи татбиқи дастур ва супоришҳои Ҳукумати Ҷумҳурии Тоҷикистон, бо мақсади ташаккули роҳҳои нави самаранок ҷиҳати пешгирии паҳншавии сирояти ВНМО дар ҷумҳурӣ миёни кормандони тиб, ҷавонон, омӯзгорон, хонандагони муассисаҳои таҳсилоти умумӣ, занҳои ҳомиладор ва муҳоҷирони меҳнатии як қатор мавзеъҳои вилояти Хатлон ҷамъомад баргузор гардид.
Иқдоми мазкур дар доираи иҷрои қарори Ҳукумати Ҷумҳурии Тоҷикистон аз 25 феврали соли 2017 “Дар бораи Барномаи миллӣ оид ба муқовимат бо эпидемияи вируси норасои масунияти одам дар Ҷумҳурии Тоҷикистон барои солҳои 2017-2020” сурат гирифт.
Ба иттилои дастрас, дар расми баргузор гардидани чорабинии мазкур кормандон ва мутахассисони Муассисаи давлатии «Маркази ҷумҳуриявии пешгирӣ ва мубориза бар зидди бемории ВНМО» ҷалб гардида, дар рафти он зиёда аз 1300 ҷавонон, омӯзгорон, хонандагони муассисаҳои таҳсилоти умумӣ, занҳои ҳомиладор ва муҳоҷирони меҳнатии ноҳияҳои Кушониён, Ҷайҳун ва шаҳрҳои Леваканду Бохтари вилояти Хатлон иштирок намуданд.
![](https://moh.tj/wp-content/uploads/2018/04/8678.jpg")
