Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Санаи 29 декабри соли равон дар маҷлисгоҳи Хадамоти назорати давлатии санитарию эпидемиологӣ бо иштироки муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Самариддин Ализода ҷаласаи корӣ доир гардид, ки дар кори он лоиҳаи қарори Ҳукумати Ҷумҳурии Тоҷикистон  Дар бораи “Барномаи миллӣ оид ба муқовимат ба эпидемияи вируси норасоии масунияти одам ва бемории пайдошудаи норасоии масуният дар Ҷумҳурии Тоҷикистон барои солҳои 2021-2025” муаррифӣ карда шуд.

Самариддин Ализода, муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон зимни суханронии хеш таъкид намуд, ки  барномаи мазкур бо мақсади пурзӯр намудани раванди манъшавии эпидемияи вируси норасоии масунияти одам дар Ҷумҳурии Тоҷикистон, паст намудани фавт аз бемории пайдошудаи норасоии масуният, расидан ба дастрасии баланди хизматрасонии пешгирикунанда, табобат ва нигоҳубин дар самти вируси норасоии масунияти одам барои ҳар як шахс, беҳтар намудани саломатӣ ва баланд бардоштани сифати солимии аҳолии Ҷумҳурии Тоҷикистон таҳия гардидааст.

Маврид ба тазаккур аст, ки вируси норасоии масунияти одам дар давоми 40 соли охир ба яке аз мушкилоти асосии аҳли сайёра табдил ёфтааст ва Ҷумҳурии Тоҷикистон низ ҳамчун як ҷузъи ҷудонашавандаи ҷомеаи ҷаҳонӣ дар ҳалли ин мушкилот бетараф нест. Дар ин давра, дар ҷаҳон зиёда аз 75 миллион одамон ба ин сироят гирифтор шуда, қариб 33 миллион фавтидаанд, ки 43%-ро ташкил медиҳад.

Дар рафти баргузории чорабинӣ таъкид гардид, ки Ҷумҳурии Тоҷикистон  оид ба пешгирӣ ва мубориза ба эпидемияи вируси норасоии масунияти одам тамоми ҳуҷҷатҳои муҳими байналмилалиро дар чаҳорчубаи расидан ба Ҳадафҳои рушди устувор ҳамаҷониба эътироф  ва дастгирӣ менамояд.

Давоми солҳои охир дар ҷаҳон пешрафти назаррас дар самти паст намудани сатҳи сирояти вируси норасоии масунияти одам ба мушоҳида мерасад.  Махсусан, бо ин мақсад корҳои фаҳмондадиҳӣ ва дигар чорабиниҳо гузаронида мешаванд, ки баҳри баланд бардоштани маърифатнокии аҳолӣ оид ба вируси норасоии масунияти одам, роҳҳои интиқолёбӣ, усул ва роҳҳои пешгирии сирояти мазкур равона карда шудаанд.