Имрӯз, 4 феврали соли равон дар Муассисаи давлатии “Маркази ҷумҳуриявии илмии саратоншиносӣ”-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бахшида ба Рӯзи ҷаҳонии мубориза бар зидди бемории саратон таҳти унвони «Ман ҳастам ва ман хоҳам буд!» семинари омӯзишӣ доир гардид.
Дар рафти семинари омӯзишӣ масъалаҳои пешгирии бемории саратон мавриди таҳлил ва баррасӣ қарор гирифта шуда, доир ба роҳҳои нави пешгирӣ ва табобати бемории мазкур аз ҷониби мутахассисони варзидаи соҳа маърӯзаҳои пурмуҳтаво пешниҳод карда шуданд.
Ёдовар мешавем, ки чанде қабл мутахассисони Муассисаи давлатии “Маркази ҷумҳуриявии илмии саратоншиносӣ”-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар доираи имконоти мавҷуда ва воридоти дастгоҳи муосири тиббӣ нахустин маротиба дар мамлакат ҷарроҳии саратони бачадонро бо истифодаи таҷҳизоти эндовидеоӣ муваффақона анҷом доданд.
Бояд гуфт, ки айни замон дар маркази мазкур даҳҳо нафар мутахассисони варзидаи соҳа, ки дар бонуфӯзтарин муассисаҳои илмию хизматрасонии тиббии кишварҳои тараққикардаи ҷаҳон такмили ихтисос гирифтаанд, фаъолият менамоянд.
Маврид ба зикр аст, ки давоми солҳои охир маҳз бо дастгирии Ҳукумати Ҷумҳурии Тоҷикистон ва Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар маркази мазкур якчанд номгӯи дастгоҳу таҷҳизоти муосири тиббӣ дастрас карда шудааст, ки тавассути онҳо барои хизматрасонии тиббӣ шароити фароҳам оварда шудааст.