Бо мақсади аз наздик шиносоӣ пайдо намудан бо фаъолияти муассисаҳои тандурустӣ ва ҳифзи иҷтимоии аҳолӣ ва омодагии онҳо ба давраи зимистон боздиди роҳбарияти Вазорати тандрурустӣ ва ҳифзи иҷтимоии аҳолии Ҷумҳурии Тоҷикистон аз муассисаҳои тандурустӣ ва ҳифзи иҷтимоии аҳолии шаҳру ноҳияҳои кишвар идома дорад.
Имрӯз, 2 декабри соли равон вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода аз рафти омодагии Муассисаи давлатии “Маркази миллии тавонбахшии кӯдакони маъюб “Чорбоғ” дар ноҳияи Варзоб” барои муътадил гузаронидани фасли зимистон дидан ба амал овард.
Дар ҷараёни боздид масъулини марказ ба вазири тандурустӣ ва ҳифзи иҷтимоии аҳолии кишвар иттилоъ доданд, ки барои хуб ва муътадил гузаронидани фасли зимистон дар муассисаи мазкур захираи кофии сӯзишворӣ ва маводи хӯрока муҳайё карда шудааст.Ҳамзамон, вазири тандурустӣ ва ҳифзи иҷтимоии аҳолӣ аз ошхонаи муассисаи зикршуда дидан намуда, бо рафти хизматрасонӣ ба бошандагони он шинос шуд.
Ҷиҳати бартараф намудани мушкилот ва камбудиҳои мавҷуда вазири тандурустӣ ва ҳифзи иҷтимоии аҳолии кишвар Ҷамолиддин Абдуллозода ба масъулин дастуру супоришҳои мушаххас дод.
![](https://moh.tj/wp-content/uploads/2018/04/8678.jpg")
