Субҳи имрӯз дар меҳмонхонаи «Хаят Реҷенсӣ» воқеъ дар пойтахти кишвар шаҳри Душанбе, вобаста ба ҷамъбасти ҳисоботи Лоиҳаи кӯмаки техникии Иттиҳоди Аврупо оид ба “Барномаи дастгирии рушди нерӯи инсонӣ “Марҳилаи 2” мизи мудаввар баргузор гардид.
Мизи мудавварро Мирҳамуддин Камолзода, муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон роҳбарӣ наммуда, дар кори он Дилором Содиқова, ёрдамчии вазири тандурустӣ ва ҳифзи иҷтимоии аҳолии Ҷумҳурии Тоҷикистон, ходимон ва намояндагони Намояндагии Иттиҳоди Аврупо дар Ҷумҳурии Тоҷикистон, сардорони раёсату шӯъбаҳои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, намояндагони шарикони рушд, коршиносони байналмиллалӣ, намояндагони ВАО ва дигар шахсони расмӣ иштирок ва суханронӣ намуданд.
“Саҳми Иттиҳоди Аврупо дар раванди рушди соҳа”, “Иттиҳоди Аврупо, дурнамо ва қадамҳои минбаъда дар самти рушди соҳаҳои тандурустӣ ва ҳифзи иҷтимоии аҳолӣ”, “Баррасии масъалаҳои “Идоракунӣ” ҳамчун омили калидии истифодабарии самараноки захираҳо ”, “Баррасии ҳамкориҳо бо Иттиҳоди Аврупо дар раванди ислоҳоти маблағгузории соҳаи тандурустӣ”, “Баррасии масъалаҳои ҳифзи иҷтимоии аҳолӣ” аз масъалаҳои аслие буданд, ки дар рафти мизи мудаввар маввриди омӯзиш қарор дода шуданд.